تائیوان میں چین مخالف احتجاجی ریلی

تائیوان میں ہفتے کے دن کئی ہزار افراد نے آزادی کے حق میں احتجاجی مظاہرے میں حصہ لیا۔ میڈیا رپورٹوں کے مطابق تائپے میں ہوئے ان مظاہروں میں شرکاء نے چین سے باقاعدہ آزادی کے حوالے سے ریفرنڈم کرانے کا مطالبہ بھی کیا۔ اس موقع پر مظاہرین نے بیجنگ کی طرف سے تنگ کرنے والے مبینہ اقدامات کو ہدف تنقید بنایا۔ رواں برس کے دوران یہ اپنی نوعیت کی سب سے بڑی احتجاجی ریلی قرار دی جا رہی ہے۔ حالیہ عرصے میں چین اور تائیوان کے باہمی تعلقات میں کشیدگی بھی دیکھی جا رہی ہے۔